Starte og drive bedrift- dagen 2018

Årets Starte og drive bedrift- dag gjekk av stabelen 18.september på Kilstraumen brygge. Her fekk dei frammøtte mykje god informasjon knytt til oppstart og drifting av eiga verksemd. og høve til ein hyggeleg prat og eit godt måltid mat med deltakarar og foredragshaldarar. 

Konseptet er utvikla av Signar Slåttøy, mangeårig medarbeidar i Brønnøysundregisteret. I år er det 2. år på rad at Næringshagane er samarbeidspartnar for gjennomføring av arrangementet i regionen vår. 

---

Per Lerøy, ordførar i Austrheim, stod for opninga og avslutninga av arrangementet.

EIT BREIDT SPEKTER AV FOREDRAGSHALDARAR
Dei frammøtte fekk høyre gründerhistoriane til Kenneth Birkeland frå Norva 24 og Trude Isdal Fosse frå Tveiten bær og gardsprodukter, i tillegg til å høyre og snakke med aktørar frå lokalt virkemiddelapparat; Nordhordland næringslag, Industriutvikling vest, Gulen og Masfjorden utvikling og Næringshagene for utvikling og vekst og Sparebanken vest, og frå nasjonalt virkemiddelapparat: Altinn, Patentstyret, Norid, Brønnøysundregisteret, Innovasjon Norge, Skatteetaten og NAV. I tillegg deltok Kjell Ulvatn frå reknskapsbyrået Hagel D med eit interessant om reknskapsføring, og Tobby Sander Tomassen frå Osterøy Utvikling avslutta det heile med eit engasjerande innlegg om marknadsføring. ​

Mange hadde møtt fram for å få med seg mykje nyttig informasjon knytt til etablering av eiga verksemd. 

LOKALE GRÜDERAR IMPONERTE
Kenneth Birkeland, dagleg leiar i Norva 24 imponerte forsamlinga med historia si. Han  fortalde frå tida da han som 16-åring starta eiga verksemd og fram til i dag er leiar for eitselskap som har omsetjing i hundremillionerkronersklassen. Kenneth er levande oppteken av utvikling og vekst, og hinta frampå om at dersom det var nokre med gode idear i regionen så kan det være moglegheiter for økonomisk bistand om dei har trua på ideen og ikkje minst personen bak.  

Trude Isdal Fosse frå Tveiten Bær og Gardsprodukter har brøyta veg i eit noko anna terreng enn Kenneth frå Norva 24. Med utgangspunkt i eiga interesse for jordbruk driv Trude  no på framifrå vis gardsbutikk på familiegarden i Alversund. Her sel ho eigenproduserte bringebær, syltetøy, brød og bakervarer, i tillegg til andre lokale produkt frå andre lokale produsentar. Til forsamlinga kunne Trude fortelje at vegen frå oppstart til der ho er i dag har innehalde det meste av prøving og feiling, beinhard jobbing, ned- og oppturar, men at det har vore vel verdt det. Forsamlinga satt lydhøyre medan Trude på engasjert vis formidla si historie og me er mange som gler oss over den positive utviklinga ho og selskapet hennar opplever. ​

ORDFØRAREN VAR MED
Det ordføraren i Austrheim opna og var tilstades under heile arrangementet var det mange som sette stor pris på. 
- For Austrheim og regionen som heilheit er det strålande at Næringshagane arrangerer ein slik dag med fokus på entreprenørskap, utvikling og vekst, seier Per Lerøy. - I vår region har me hatt stor glede og nytte av Mongstad og all aktivitet som raffineriet har generert og fortsatt genererer, men me ser heilt klart at det er viktig å skape eit enda meir balansert næringsliv framover slik at me er best mogleg rusta til å møte det som venter, spesielt med tanke på det mykje omtalte grøne skiftet. I vår region er her mange muligheter og potensiale, ikkje minst med tanke på Fensfjordbassenget, både til sjøs og på land. Me ønsker nye tankar og idear velkomne, kom gjerne og snakk med oss om du har gode idear, så vil kommunen hjelpa der me kan, avsluttar han. 

Frå venstre: Eldbjørg Ness, forretningsutviklar, Per Lerøy, ordførar i Austrheim, og Kate Bentzen, dagleg leiar i Nordhordland Næringshage. Veronica Haveland, dagleg leiar for Gulen og Masfjorden Næringshage var ikkje tilstades da biletet vart tatt.

Næringshagane takkar så mykje til alle som bidrog til eit vellukka arrangement. 

Tekst: Eldbjørg Ness     Foto: Tina Monslaup